ការបិទព្រំដែនជាមួយកម្ពុជា អាចអោយប្រទេសថៃ ខាតបង់ទឹកប្រាក់ដល់ជាង ១ ៨០០ លានដុល្លារ

តាមការប៉ាន់ស្មានពី នាយកដ្ឋានពាណិជ្ជកម្មបរទេសប្រទេសថៃ (DFT) បង្ហាញថា ប្រសិនបើ នៅតែបន្ដបិទច្រកព្រំដែនរវាងកម្ពុជា-ថៃ រហូតដល់ដំណាច់ឆ្នាំ២០២៥ ដោយមិនមានដំណោះស្រាយទេនោះ ប្រទេសថៃ នឹងអាចខាតបង់ទឹកប្រាក់យ៉ាងតិច ៦០ ពាន់លានបាត ឬប្រហែល ១ ៨៤៩ លានដុល្លារ នៅពាក់កណ្ដាលឆ្នាំ២០២៥ នេះ។

ការប៉ាន់ស្មាននេះ ត្រូវបានវាយតម្លៃដោយផ្អែកលើទំហំពាណិជ្ជកម្មរវាងកម្ពុជា-ថៃ កាលពីឆ្នាំ២០២៤ ដោយពាណិជ្ជកម្មតាមព្រំដែនប្រទេសទាំងពីរ សម្រេចបានក្នុងរង្វង់ទឹកប្រាក់ ៥,៤ ពាន់លានដុល្លារ ក្នុងនោះការនាំចូលពីថៃមកកម្ពុជា មានចំនួនជាង ៤,៣ ពាន់លានដុល្លារ ចំណែកការនាំទំនិញពីកម្ពុជា ទៅកាន់ប្រទេសថៃ មានខ្ទង់ ១ ពាន់លានដុល្លារប៉ុណ្ណោះ។